貓貓狗狗都係天性好動嘅動物，經常將佢哋困係狹小空間嘅話會被投訴㗎(被佢哋投訴)!
一於就喺日常生活取材，親身創作、親手製作自家愛心牌嘅玩具俾心愛嘅主子，有愛心又有心思!咁就唔洗驚佢哋做屋企嘅破壞王，日後服侍主子嘅生涯都無咁辛苦啦!
我哋愛心爆棚嘅寵物玩具達人導師會一人分飾兩角:
一邊教授貓奴以顏色繽紛嘅優質絨布配上針線，親手縫製外形極之吸引嘅漢堡包/冬甩，再將香氣四溢嘅貓草填滿核心，挑戰一眾閒時對主人不抽不睬嘅高竇貓咪。
另一邊廂，導師會指導狗仔主人以色彩艷麗、秀氣並重嘅綿布/絨布，親手以獨特交錯的紋理，編織出大狗宣洩暴力嘅恩物: 實淨粗大狗狗綿布玩具，同埋細狗鍛鍊牙力嘅寶品: 彈力精緻狗狗絨布玩具。
無論你養嘅係大貓、大狗、細貓、細狗，都包保你同你嘅寵物滿載而歸。